سٹیٹ بینک کی طرف سے کووڈ-19 کے اقدامات

اسکیم کا خلاصہ

قرض گیروں کو ان کے قرضوں کی تنظیمِ نو اور التوا کی سہولت دینے کے لیے اسٹیٹ بینک کی جانب سے قرضے کے اجرا اور ری اسٹرکچرنگ کے پیکیج (ڈیٹ ریلیف اسکیم) کا اعلان کیا گیا ۔ ڈیٹ ریلیف اسکیم کا مقصد قرض گیروں کی ادائیگی قرض کی صلاحیت کو محفوظ بنانا اور انھیں اس عارضی معاشی خلل کا سامنا کرنے کے قابل بنانا تھا۔

ڈیٹ ریلیف اسکیم پر عوام کا ردعمل بہت مثبت رہا ہے اور کارپوریٹ / کمرشل اور خردہ قرض گیروں سمیت تمام زمروں کے صارفین اس سے مستفید ہوئے ہیں۔

(ملتوی کی گئی اصل رقم اور ری اسٹرکچر کیے گئے قرضوں کی رقوم ارب روپے میں)

16 اپریل 2021ء تک اعدادوشمار

بینکوں اور ترقیاتی مالی اداروں نے 02 اپریل 2021ء تک موصول ہونے والی 1.883 ملین درخواستوں میں سے 1.825 ملین درخواستیں منظور کیں (96.92 فیصد)۔ اسکیم کے آغاز کے بعد سے ، انفرادی قرض گیروں ، بالخصوص، مائکرو فنانس بینکوں کے صارفین نے اسکیم سے سب سے زیادہ استفادہ کیا ۔ ری اسٹرکچرڈ اور مؤخر قرضوں میں مائکرو فنانس بینکوں کے صارفین کی 121 ارب روپے کی 1.717 ملین منظور شدہ درخواستیں شامل ہیں ، جو مائکروفنانس بینکوں کے قرضے کے خالص جزدان کا تقریباً 50 فیصد بنتا ہے۔

جبکہ 910 ارب روپے کی مجموعی ری اسٹرکچرڈ اور مؤخر رقم میں سے 717 ارب روپے کارپوریٹ اور کمرشل قرض گیروں سے تعلق رکھتے ہیں ؛ کیونکہ بینکاری صنعت کے کارپوریٹ قرضوں کا جزدان بینکوں ، مائکرو فنانس بینکوں اور ترقیاتی مالی اداروں کے مجموعی قرضہ جزدان کا 69.9 فیصد ہے۔

گذشتہ پندرہ دنوں کے دوران مالی اداروں کی کارکردگی جامد رہی ہے کیونکہ ری اسٹرکچرنگ اسکیم کی آخری تاریخ جو 31 مارچ 2021ء تھی، گزر چکی ہے۔

اسکیم کا خلاصہ

کورونا وائرس پر قابوپانے کے لیے عارضی مدت کی ری فنانس سہولت( آر ایف سی سی) شعبۂ صحت کی صلاحیت بڑھانے کے لیے ہے تاکہ خصوصاً کورونا کے پس منظر میں ہنگامی صورتِ حال سے نمٹا جا سکے ۔ اس کے تحت بینکوں /ترقیاتی مالی اداروں کے ذریعے قرضے اسپتالوں اور طبی مراکز کے لیے ہیں جن سے وہ نہ صرف کورونا سے نمٹنے کی بلکہ مجموعی استعداد بھی بڑھا سکتے ہیں۔ ماسک/حفاظتی لباس / ٹیسٹنگ کٹس، اسپتال کے بستر، وینٹی لیٹر اور کووڈ سے نمٹنے کی دیگر اشیا بنانے والے بھی اس مالکاری سے استفادہ کرسکیں گے۔

اسکیم کا خلاصہ

اسکیم کا مقصد یہ ہے کہ ہر طرح کے کاروباری اداروں ماسوائے سرکاری اداروں، سرکاری شعبے کے اداروں، خود مختار اداروں اور ڈپازٹ لینے والے مالی اداروں کے ملازمین (مستقل، عارضی، یومیہ اجرت والے، اور آؤٹ سورس) کی چھ ماہ (اپریل 2020ء تا ستمبر 2020ء) کی اجرت اور تنخواہ کی مالکاری کر کے ان ملازمین کو برطرفی سے بچایا جائے۔