جدت طرازی مرکز

ایس بی پی جدت طرازی کا تعارف

ایک جدت پسند اور شمولیتی ڈجیٹل مالی نظام کی تشکیل کے لیے جدت طرازی مرکز یک متحرک پلیٹ فارم کے طور پر کام کرتا ہے جو ضابطہ کاروں ، فن ٹیک جدت طرازوں ، اسٹارٹ اپ فرموں اور صنعتی فریقوں کے درمیان تعاون کو فروغ دیتا ہے۔ یہ پلیٹ فارم اوپن بینکاری ، مصنوعی ذہانت (اے آئی)، اور ڈسٹری بیوٹڈ لیجر ٹیکنالوجی جیسی جدید ٹیکنالوجیوں کو فروغ دیتا ہے، اور فن ٹیک کی ترقی کو تیز کرنے کے لیے ورک اسپیس، رہنمائی اور آزمائشی بنیادوں پر مواقع فراہم کرتا ہے۔ جدت اور ضابطہ کاری کے درمیان خلا کو پُر کرتے ہوئے جدت طرازی مرکز مالی شمولیت اور اسمارٹ ضابطہ کاری پر توجہ دینے کے ساتھ ڈجیٹل فنانس کے مستقبل کو تشکیل دے رہا ہے۔

اسٹیٹ بینک آف پاکستان (ایس بی پی) نے مالی شعبے میں جدت اور ٹیکنالوجی پر مبنی خدمات کو فروغ دینے کی اپنی مسلسل کوششوں کے تحت جدت طرازی مرکز قائم کیا ہے۔ ایس بی پی وژن 2028 ءکی رہنمائی میں یہ مرکز ایک ایسے پلیٹ فارم کے طور پر ڈیزائن کیا گیا ہے جہاں جدت طراز بشمول افراد، فن ٹیک کمپنیاں، اسٹارٹ اپ فرمیں اور مالی نظام کے دیگر ممکنہ شراکت دار براہِ راست اسٹیٹ بینک کے ساتھ رابطہ قائم کر سکتے ہیں۔

جدت طرازی مرکز درج ذیل طریقوں سے مرکزی بینک اور جدت کے معاون نظام کے درمیان پل کا کردار ادا کرے گا :

• نئی مالی ٹیکنالوجیوں کی جانچ اور بہتری لانے کے لیے باہمی تعاون پر مبنی ماحول فراہم کرنا۔
• ضابطہ کاروں اور جدت طرازوں کے درمیان مکالمے کو فروغ دینا تاکہ ذمہ دارانہ، شمولیتی اور قابلِ پیمائش خدمات کو یقینی بنایا جا سکے۔
• ڈجیٹل فنانس کی ایسی خدمات تیار کرنے کی حوصلہ افزائی کرنا جو مالی شمولیت، کارکردگی اور پائیداری میں اضافہ کریں ۔

آئیڈیاز کی پرورش

جدت طرازی مرکز ایسا منظم ماحول فراہم کرے گا جس میں ابتدائی مرحلے کے خیالات کو قابلِ عمل مالی خدمات میں تبدیل کیا جا سکے۔ جدت طراز اپنے تصورات پیش کر سکیں گے اور اپنی تجاویز کو بہتر بنانے کے لیے فیڈبیک، تکنیکی رہنمائی اور ضوابطی بصیرت حاصل کرسکیں گے۔یہ مرکز اس عمل کو تقویت دینے کے لیے ماہرین کے مشوروں تک رسائی اور معلوماتی پروگراموں میں سہولت دینے کے ساتھ متعلقہ اسٹیک ہولڈرز سے نیٹ ورکنگ کے مواقع فراہم کرے گا۔ اس کا مقصد یہ ہے کہ جدت طراز اپنے خیالات کو تصورسے ابتدائی ماڈل تک اس انداز میں لے جائیں جو عملی، ذمہ دارانہ اور پاکستان کے مالی شعبے کی ترجیحات سے ہم آہنگ ہو۔