بینک نوٹ

انتظامِ کرنسی کی حکمتِ عملی

اسٹیٹ بینک نے اگست 2015ء میں بینکوں کے لیے انتظامِ کرنسی کی حکمتِ عملی جاری کی، جس کے مقاصد درج ذیل ہیں:

1. نقدی کے انتظام کو بین الاقوامی اور علاقائی بہترین طریقوں سے ہم آہنگ کرنا۔
2. اس بات کو یقینی بنانا کہ بینکوں کے پاس جعلی بینک نوٹوں کی نشاندہی کرنے کی ضروری استعداد موجود ہو، تاکہ بینکوں کی جانب سے کوئی جعلی بینک نوٹ جاری نہ کیا جائے۔
3. زیرِ گردش بینک نوٹوں کے معیار کو بہتر بنانا۔

اس حکمتِ عملی کے تحت تمام بینکوں کو ہدایت دی گئی کہ وہ ملک بھر میں اپنی کرنسی آپریشنز کو خودکار بنائیں اور اپنی برانچوں اور اے ٹی ایم مشینوں کے ذریعے عوام کو صرف مشین سے تصدیق شدہ بینک نوٹ ہی جاری کریں۔ بینکوں کو یہ بھی ہدایت دی گئی کہ وہ نقدی کی پراسیسنگ کے تمام مراحل کی نگرانی کے لیے ہائی ریزولوشن کیمروں کے ذریعے مکمل کوریج یقینی بنائیں اور سی سی ٹی وی فوٹیج کم از کم 60 دن تک محفوظ رکھیں۔ کسی بھی تنازع کی صورت میں اس فوٹیج کو استعمال کیا جاتا ہے۔ بینک نوٹوں کی تصدیقی مشینوں کے ذریعے پراسیسنگ، سی سی ٹی وی ریکارڈ کا تحفظ اور معیاری پیکنگ کا مقصد یہ ہے کہ بینکوں کی جانب سے کوئی جعلی بینک نوٹ جاری نہ ہو اور اگر کسی صورت میں جعلی بینک نوٹ بینکاری نظام میں داخل ہو جائے تو بینک اسے شناخت کر کے روکنے کی صلاحیت رکھتے ہوں۔ اسٹیٹ بینک کی کیش مانیٹرنگ ٹیمیں بھی بینکوں کی برانچوں اور اے ٹی ایم کا اچانک دورہ کرتی ہیں تاکہ انتظامِ کرنسی کی حکمتِ عملی کی ہدایات پر عمل درآمد کا جائزہ لیا جا سکے۔ جو بینک ان ہدایات کی تعمیل نہیں کرتے، ان پر بھاری جرمانے عائد کیے جاتے ہیں۔