آر ٹی جی ایس سے مراد مجموعی تصفیے کا ایک نظام ہے جس میں پراسیسنگ اور رقوم کی منتقلی کے حتمی تصفیے کی ہدایات دونوں کام مسلسل (یعنی بر وقت) ہو سکتے ہیں۔ چونکہ یہ بروقت تصفیے کا ایک نظام ہے، اس لیے اگر بھیجنے والے بینک کے پاس کافی محفوظ رقم یا کریڈٹ موجود ہو تو یہ نظام حتمی تصفیہ بھی مسلسل انجام دیتا رہتا ہے بجائے اس کے کہ پہلے سے متعین اوقات میں وقتاً فوقتاً یہ کام انجام دے۔ مزید برآں ، تصفیے کا یہ عمل مرکزی بینک کی رقم کی بر وقت منتقلی پر مبنی ہے۔ اس طرح آر ٹی جی ایس کی شناخت رقوم کی منتقلی کے ایک نظام کے طور پر کی جا سکتی ہے جو انفرادی منتقلی کے لیے امزور کا مسلسل حتمی تصفیہ کرنے کے قابل ہے۔

پاکستان میں آر ٹی جی ایس کی ضرورت اُس وقت محسوس کی گئی جب یہ آگاہی بڑھی کہ بڑی مالیت کی رقوم کی منتقلی کے نظام میں خطرے سے مستحکم بچاؤ ہونا چاہیے۔ آر ٹی جی ایس بین البینک تصفیے کے عمل میں تصفیے اور نظامی خطرات کو محدود کرنے کا ایک طاقتور طریقہ کار پیش کرتا ہے، کیونکہ یہ خطرات پراسیسنگ ولے دن کے دوران مسلسل بنیادوں پر انفرادی رقوم کی منتقلی کے حتمی تصفیے کو متاثر کرتے ہیں۔ مزید یہ کہ آر ٹی جی ایس فراہمی بمقابلہ ادائیگی (ڈی وی پی) میکنزم کی بنیاد فراہم کرکے سیکورٹیز کے لین دین میں تصفیے کا خطرہ کم کرنے میں بھی کردار ادا کر سکتا ہے۔ لہٰذا، ادائیگی اور تصفیے کے نظام میں رسک مینجمنٹ کو زیرِ غور لایا جائے تو آر ٹی جی ایس بہت ضروری ہے۔

پاکستان میں آر ٹی جی ایس کو پاکستان ریئل ٹائم انٹربینک سیٹلمنٹ میکنزم (یعنی بڑی مالیت کی رقوم کی بروقت منتقلی کا نظام یا پرزم) کا نام دیا گیا ہے۔ یہ پاکستان کا بڑی مالیت کی ادائیگی کا واحد نظام ہے۔ اس کی خوبی یہ ہے کہ یہ مجموعی تصفیہ بروقت انجام دیتا ہے۔ یہ بڑی مالیت کی بین البینک رقوم کی منتقلی، سرکاری تمسکات ، ریٹیل کلیئرنگ اور صارفین کی رقوم کی منتقلی (ایک مخصوص کم از کم حد تک) کے تصفیے کے لیے ایک مرکزی پلیٹ فارم ہے۔ اس کا آغاز جولائی 2008 ء میں کیا گیا تھا اور تب سے اس نے اپنے آپریشن میں نمایاں توسیع کی ہے۔ اس وقت پرزم کے 42 براہ راست شرکا ہیں جن میں کمرشل بینک، ترقیاتی مالی ادارے، مائکرو فنانس بینک اور سینٹرل ڈپازٹری کمپنی (سی ڈی سی) شامل ہیں۔ پرزم سسٹم آپریٹنگ رولز (2009) شرکا کومساوی مواقع دینے کے لیے جاری کیے گئے تھے۔