روشن سماجی خدمات روشن ڈجیٹل اکاؤنٹ کے حامل غیرمقیم پاکستانیوں کو یہ سہولت دیتا ہے کہ وہ اپنے فلاحی عطیات، چندے، اور زکوٰۃ کی رقم پاکستان بھجوانے کے لیے ون اسٹاپ پیمنٹ پلیٹ فارم استعمال کریں (یعنی ایک ہی ڈجیٹل پلیٹ فارم سے کئی جگہ رقم ادا کریں)۔حتیٰ کہ وہ دنیا بھر میں کہیں بھی رہ کر پاکستان میں معروف اداروں کے ذریعے قربانی کا فریضہ ادا کرسکتے ہیں۔

اب غیرمقیم پاکستانیوں کو اپنی مرضی کے اداروں کو عطیات دینے یا رقوم کی بین الاقوامی منتقلی کے لیے ان اداروں کے بینک اکاؤنٹ کی تفصیلات بتانے کی ضرورت نہیں ہو گی۔ بینکوں کی جانب سے روشن سماجی خدمات کا پلیٹ فارم موجود ہے جس کے ذریعے غیرمقیم پاکستانی ملک میں سماجی بہبود کے معروف اداروں، تعلیمی اداروں اور اسپتالوں کو محض چند کلکس کے ساتھ عطیات دے سکتے ہیں ۔ زکوٰۃ کی ادائیگی اور قربانی کا فریضہ بھی اسی طرح ادا کرسکتے ہیں۔

احساس پروگرام کے ساتھ وابستگی: غیرمقیم پاکستانیوں کی طرف سے فقیدالمثال احساس پروگرام میں عطیات کی غرض سے ایک لنک بھی دستیاب ہے۔

صارفین اپنے بینکوں کے روشن ڈجیٹل اکاؤنٹ کے ویب پیجز پر موجود روشن سماجی خدمات کے پورٹل پر جائیں گے۔پورٹل پر انہیں عطیات وصول کرنے والے اداروں، جیسے آغا خان اسپتال، اخوت فاؤنڈیشن، چھیپا، سٹیزنز فاؤنڈیشن، ایدھی، انڈس اسپتال، ایل آر بی ٹی اسپتال، سیلانی، شوکت خانم اسپتال (پورٹل میں ا داروں کے نام مختلف ہوسکتے ہیں) کے ناموں کی فہرست ملے گی۔ عطیات دینے یا قربانی کی بُکنگ کرانا غیرمقیم پاکستانیوں کے لیے نہایت آسان ہے۔