ایک ترقی پذیر ملک کے مرکزی بینک کی طرح بینک دولت پاکستان بھی کلی معاشی اہداف کے حصول کے لیےروایتی اور ترقیاتی دونوں ہی وظائف سرانجام دیتا ہے۔ روایتی وظائف کو، جو دنیا بھر کے تقریباً تمام مرکزی بینک بالعموم ادا کرتے ہیں، دو گروپوں میں تقسیم کیا جاسکتا ہے: (الف) بنیادی وظائف بشمول نوٹوں کا اجرا، مالی نظام کا انضباط اور نگرانی، بینکاروں کا بینک ہونا، حتمی قرض دہندہ ، حکومت کے لیے بینکر ہونا، اور زری پالیسی کا انتظام ، اور (ب) ثانوی وظائف بشمول رابطہ کاری امور جیسے سرکاری قرضوں کا انتظام ، زرمبادلہ وغیرہ کا انتظام، اور دیگر افعال جیسے پالیسی امور پر حکومت کو صلاح مشورہ دینا اور بین الاقوامی مالی اداروں کے ساتھ قریبی روابط رکھنا ۔

اسٹیٹ بینک کے غیر روایتی یا ترقیاتی افعال میں مالی فریم ورک کی تشکیل، بچتوں اور سرمایہ کاری کی ادارہ بندی، بینکاروں کو تربیتی سہولیات کی فراہمی، اور ترجیحی شعبوں کو قرضوں کی فراہمی شامل ہیں۔ بینک دولت پاکستان بینکاری نظام کو اسلامی اصولوں کے مطابق ڈھالنے کے عمل میں بھی سرگرم کردار ادا کرتا رہا ہے۔ اسٹیٹ بینک کے اہم وظائف اور ذمہ داریوں کی درجہ بندی یوں کی جاسکتی ہے:

سیالیت کا انضباط
ملک کا مرکزی بینک ہونے کی بنا پر بینک دولت پاکستان کویہ ذمہ داری تفویض کی گئی ہے کہ زری اور قرضہ  پالیسی اس طرح تیار کرے اور اس کا انتظام کرے کہ  نمو اور گرانی سے متعلق حکومت کے اہداف سے، اور کلی معاشی پالیسی کے مقاصد  کے لحاظ سے زری اور مالیاتی پالیسیوں کے رابطہ بورڈ کی  سفارشات سے ہم آہنگ ہو۔اپنے وظائف کے اعتبار سے اس کا بنیادی مقصد دو جہتی ہے: ملکی قیمتوں میں استحکام  کے لیے زری استحکام برقرار رکھنا،   اور اس کے ساتھ ہی معاشی نمو کا فروغ۔

مختلف استعمالات اور شعبہ جات کی طرف قرضوں کی رقوم کا حجم اور سمت منضبط کرنے کے لیے اسٹیٹ بینک زری انتظام کے بلاواسطہ اور بالواسطہ دونوں ہی طریقے استعمال کرتا ہے۔ کچھ عرصہ پہلے تک زر اور قرضوں کی صورت حال قرضہ منڈیوں کی شدید دھڑے بندیوں اور ان سے ہونے والی ابتری کا شکار تھی۔ پاکستان نے 1980ء کی دہائی کے اواخر میں مالی شعبے کی اصلاحات کا ایک پروگرام شروع کیا۔ تب سے اب تک زری انتظام کے طریقہ کار میں کئی ایک بنیادی تبدیلیاں کی جا چکی ہیں جن کی خصوصیت یہ ہے کہ زری انتظام انتظامی کنٹرولز اور مقداری پابندیوں سے نکل کر مارکیٹ کی بنیاد پر تشکیل کی طرف آ گیا۔ زربنیاد کے انتظام کا بھی ایک منصوبہ تیار کیا گیا ہے۔ منصوبے کے مطابق زرِ بنیاد کے مطلوبہ راستے کی پابندی کر کے ایم 2 کا وساطتی ہدف " آپریٹنگ ہدف" حاصل ہوگا۔ اب کنٹرول کے بالواسطہ طریقے، جیسے نقد محفوظ کا تناسب اور سیالیت کا تناسب، استعمال کیے جا رہے ہیں، جبکہ منصوبے کا زیادہ تر انحصار بازار زر کے سودوں پر ہے۔

مالی نظام کے استحکام کو یقینی بنانا

انضباط اور نگرانی مالی نظام کی ضابطہ سازی اور نگرانی اسٹیٹ بینک کی بنیادی ذمہ داریوں میں سے ایک ہے، تاکہ مالی نظام کے استحکام اور پائیداری کے ساتھ ساتھ امانت گزاروں کے مفادات کا تحفظ یقینی بنایا جا سکے۔ انفارمیشن ٹیکنالوجی میں تیزی سے ترقی کے علاوہ جدید بینکاری سرگرمیوں میں بڑھتی ہوئی پیچیدگیوں نے نگرانی کے عمل کو مزید دشوار اور صبرآزما بنا دیا ہے۔ ادارہ جاتی پیچیدگی بڑھ رہی ہے، تکنیکی باریکیوں میں اضافہ ہورہا ہے اور بینکاری سرگرمیوں میں تیکنیکی پہلو وسیع ہو رہا ہے۔ یہ سب تبدیلیاں تقاضہ کرتی ہیں کہ اسٹیٹ بینک ملک کے تیزی سے بدلتے مالی منظرنامے سے ہم آہنگ رہنے کے لیے سخت کوشش کرے۔ اسی طرح مالی اداروں کی بہتر جانچ اور نگرانی کرنے کے لیے فرسودہ طریقوں کی جگہ نئے طریقے اختیار کیے گئے ہیں۔ بینکاری سرگرمیوں پر نگاہ رکھنے کے لیے اب فاصلاتی نگرانی اور برمقام معائنہ و دیکھ بھال کا طریقہ اپنایا گیا ہے۔ اسٹیٹ بینک مختلف بینکوں کی جانب سے متواتر موصول ہونے والے مختلف گوشواروں کی باقاعدہ پڑتال کر کے فاصلاتی نگرانی انجام دیتا ہے۔ دوسری جانب جب کبھی ضرورت ہو تو اسٹیٹ بینک متعلقہ بینکوں کی حدود میں جا کر ان کا برمقام معائنہ بھی کرتا ہے۔

اسٹیٹ بینک کا ارتقائی کردار